隨心所想

今日，因工作開左一個會、同聽左一個講座，心中某一件心事如濃痰糾結在喉間，不吐不快。深宵打文，唔執字、想打乜就打乜，以下講既野你信又好，唔信都無辦法，開波。

圖求其搵

今日老闆一反常態，用左開放式題目帶大家啟發一下工作上既諗法，雖然都係講d知易行難既野，不過大抵座上同事都習慣單向報告，所以老闆set波都無乜人接到，內容唔詳講，只講下由開完會直到呢一刻凌晨兩點二十六分，腦入面諗既野。

做marketing，第一樣野除左貨品好，最重要係點樣同客講。知道客需要d咩好重要，有道是「有麝自然香」，但如果「麝香放左係密封箱入面」，都係無用。

談戀愛都係，我可以100%肯定，講多一次我100%肯定，靚唔靚仔、聰唔聰明，並唔係取決於你有無拖拍的因素。只要擊中對方心底需要d咩，基本上就已經坐定粒六。所以你會見到，有d不可理瑜既情侶配搭，完全唔明白點解會一齊到，撇除妒忌心之外，正正就係互相汲取所需。

曾經有人問我：「你鍾意我d乜？」我唔識答，鍾意唔鍾意係幾秒之間未必答得出，而平時自己都唔會刻意去雕琢「標準答案」。鍾意真係無得解，感覺已經係最無敵答案，不過感覺只係結果，催化成為感覺既，其實係對方能夠給予你既需要，例如心靈、時間既填補、性、幻想、共享興趣、相處溝通等等等等。

「你鍾意我d乜？」，的確好難答，就算答到上述個幾廿字，對方都未必滿意。

因為問得呢個問題，大抵佢自己都無答案，確實d形容係隨口講。

呢個話題會回歸最初，信任。

========================================================

我一直同下屬或者師弟妹講，見工係一場競技，涉及演技，短則5分鐘既面試，正正係對方對你既感覺，利用5分鐘時間驅使對方認同你、相信你既能力。只要佢信，你就成功；談戀愛一樣。

唔講拍緊拖點樣維持互信既關係，唔係我討論範圍。好簡單，世上總有人喜歡一樣野，佢可以將所有缺點美化，就算錯佢都會用盡一切解釋，無緣無故會編制原因令自己既喜歡變成「合理化」。

你喜歡過人嗎？你認識一個唔喜歡你但喜歡第二個既人嗎？

有既話，你自然明我講乜。

======================================================

同心儀對象相處，雖然不幸，但總會聽到以下兩句：

我考慮下先

其實我唔係好想xxxxxx

大家要識得rephrase佢地：

我考慮下(點拒絕你)先

其實我唔係好想(同你)xxxxxx

===========================================================

自己好相信「事不過三」呢樣野，約人、搵人點點點，都係，三次係我既極限。

世界上無人可以話我唔主動，咩叫溝通？咩叫相處？以我既認知重點於「雙向」，當知道情況未如預期，就要收手。我唔會再揣測原因，更唔會搵原因去為對方解釋，一切都唔重要。人採取負面方式處理有千萬原因，但良性反應只有一個：你值得。

都講得好坦白啦，當有人同你講我得閒好多可以食飯，咁我約啦，但前前後後不足兩日，就講又忙返，未必得閒食飯。成個人仲唔著呀？總共三次，已經係我極限。

仲有無數個已讀不回、當睇唔到、完全唔應既人，I don't give a shit,

ANYMORE.

唔駛望，係話緊你，仲有你。

睇到呢度，請閱讀上一則段落，真相就會出現。

=============================================================

同心儀對象相處，總係為自己一切切費索思量，將最最最好一面呈現，完美無缺，但往往都會適得其反，信我，無一倖免。

攝於小說《秒速五厘米》

仲會不斷買野送俾人。其實好錯，就只會發展一段「餵與食」既關係，送喜歡既野俾人並唔等於取得其歡心，仲會令自己陷入無可挽救既地步，一不離二，每每就會煩買咩好；好可惜，對方並唔會在意你買過乜。

其次，愛屋及烏都常見於「欲追求」既階段，對方鍾意乜自己就去搵黎鍾意，短期內的確可以增加話題，但唔會維持得耐，追尾理論既根基在於「前面有條尾且無法超越」，最後只會乾塘，仲辛苦自己。重點，對方並唔會在意你鍾意過乜。

做返自己係咪好難，難。難在你因為局限於活係別人眼中，係追求既階段，改變自己去迎合對方係無乜可能成功，但絕大部分人都會咁做。

做自己需要勇氣，需要膽量，同需要承受不被人認同，尤其你在意既人。記住，「在意」呢樣咁花神既事，留俾其他人做，只有做回自己，到真係有人在意你既時候，你就知道呢種關係先會發展得舒服。

「你鍾意我d乜？」我鍾意同你一齊相處既感覺，好舒服好自然。



眼訓，講完。