一期一遇：Y小姐

所謂人活到幾歲算短，失戀只有更短，其實廿幾歲都只係好後生，不過朋友間食飯聚會圍埋討論嘅話題唔再係Peter暗戀阿Mary、英超曼聯又輸一場、或者係FIFA定Winning好玩，而係更加沉重嘅人生哲理—喂阿強，升職未呀？有女朋友未呀？結婚未呀？儲到首期未呀？啲切身問題，就算你幾唔願意答，最後都會自己摸上門，你可以扮唔知，扮唔關自己事，但避得一時，避唔到一世，好彩嘅話閣下而家撈得風生水起、鬆毛鬆翼，唔好彩嘅可能仲要睇人面色、為口奔馳，連裸辭嘅勇氣都無添。

同學A：「乜話，畢咗業咁耐連三皮都搵唔到？有無搞錯呀！」

同學B：「你都唔細啦，人地阿Derek都已經成家立室喇！」

有時候，呢啲說話真係難聽過比人話自己強國人，但事實的確如此，作為一個普通人，有邊個唔想月入三萬，有邊個唔想成家立室，怪就怪自己無出息，再慨歎一句：「葉師傅，唔係咁易嫁！」

碰巧小弟跟從前讀書時認識的班花同學Y小姐傾過，學姊佢係美利堅合眾國讀過下番書，近幾年回留香港，仕途發展得唔錯，於傳媒機構打滾一段時間，由一間跳去另一間做，愈做愈有，最近仲入埋政府，一片大好「錢」途，但怕悶嘅佢言談間不斷透露有轉工的衝動。

「其實你份工都唔錯丫！」

「但係好悶呀，我唔想做喇。」

Y小姐曾經追夢做過記者，亦做過主播，走過社會最前線，但針無兩頭利，佢話做過之後就明白一份穩定嘅工作係幾重要，但到穩定之後，又發現自己心入面仲有一團火未熄。老實講，香港地，要搵份工唔難，有人無工做，有工無人做，關鍵只係你搵唔搵到想做的工作。畢業生講理想，so99y，大部份人都未必係呢回事，或者根本就無咩「理想唔想理」，搵食啫，有咩鍾唔鍾意，有錢就得啦。從現實角度來看，的確係，份糧仲包埋受氣添，但又係咪個個都甘於平凡呢？

又似乎，年紀增長追求穩定，是不二法門，找一份穩定的工作、保障穩定的收入、維持一段穩定的感情。果啲如同賭博嘅想法，唔好試啦，因為你已經輸唔起，可能連你阿媽都會同你講「搵個事業有成嘅男人嫁左佢，唔通MK仔真係可以養你一世咩？」人大了被迫追求安定，不過熱血的心卻未必隨時間變老，你可能仲有好多想法、仲未玩夠、仲想去試新嘢。畢竟，貪新鮮係無罪嘅。其實筆者都係怕悶之人，如果唔係，小弟都唔會有勇氣祼辭去澳洲耕田。不過，我又偷偷地話你知，其實耕田都唔係咁好玩，既辛苦又無冷氣嘆，而且奉勸一句：如果你唔係有九條命的話，千萬千祈唔好嘗試裸辭—會死人的。

結果我們又回歸原點，討論最老掉牙的公式化問題—理想vs現實。蘋果創辦人喬布斯話過去猶如許多點點，要連完線才知道那些點點有甚麼用；曾替成人漫畫編對白的中學老師曾經同我講，佢人生三十歲後才真正開始。所以，此刻廿幾歲人來說仍然係too green，日後係點無人會知，擁抱這一刻才是最重要。打一份自己唔鍾意嘅工，跟有夢想被迫做一台機器的人一樣無趣，至於如何選擇，恕我幫唔到你，做人，但求心安理得。

我相信，能夠月入三萬以上那位同學，當中一定也付出過不少，其犧牲不足為外人道，或者，當大家追問佢一句「點做到」嘅時候，我都應該幫佢講返句公道說話…

「葉師傅，唔係咁易嫁。」